Më 25 mars, 2024, Internews Kosova mbajti trajnim me studentët e Universitetit “Kadri Zeka” në Gjilan, të cilët u njoftuan me narrativat e dezinformatave dhe metodologjitë e verifikimit të fakteve.

Ky trajnim u organizua në kuadër të projektit ‘’Fuqizimi i integritetit të mediave: Promovimi i Fact-Checking dhe luftimi i dezinformimit në Kosovë’’, financuar nga Bashkimi Europian, CFI (Agjensioni për zhvillimin e medias), implementuar nga Internews Kosova.

Specifikisht, në pjesën e parë, folësja e këtij trajnimi Dorentina Kastrati – Redaktore në KALLXO.com, shpjegoi kontekstin historik të dezinformatave, etikën e medias dhe kriteret të cilat ndihmojnë në identifikimin e mediave kredibile dhe profesionale. Për më tepër, Kastrati prezantoi gjetjet e raportit të BIRN, “Vorbulla e Rrenave”, të cilat theksojnë ndikimin e dezinformatave nga Rusia dhe Kina në Kosovë.

Kurse në pjesën e dytë të trajnimit, ajo shpjegoi rreth metodologjive dhe procesit të verifikimit të fakteve duke prezantuar instrumente të verifikimit të fakteve sic është Krypometër, platforma për verifikimin e fakteve e KALLXO.com.

Ky trajnimi mblodhi gjithësej 21 studentë prej të cilëve 11 vajza, të cilët parashtruan pyetje rreth mënyrave të verifikimit të fakteve dhe treguan mbi përballjen e përditshme me lajme të rreme dhe dezinformata. Prezent në këtë trajnim ishin gjithashtu edhe Z. Sadik Haxhiu – Prorektor, si dhe Z. Flamur Maloku dhe Z. Mensur Neziri – Profesorë të Universitetit të Gjilanit “Kadri Zeka”.