Nxënësit nga Mitrovica trajnohen në fushën e gazetarisë

  • Home / Nxënësit nga Mitrovica trajnohen në fushën e gazetarisë

Nxënësit nga Mitrovica trajnohen në fushën e gazetarisë

  • by internewskosova |
  • Comments off

Internews Kosova më 7 dhe 8 dhjetor ka mbajtur një trajnim për gazetari me nxënës nga Mitrovica.

17 nxënës të Gjimnazit “Frang Bardhi” në Mitrovicë morën pjesë në trajnim si pjesë e projektit për ngritjen e kapaciteteve të nxënësve me talente të veçanta në fushën e gazetarisë hulumtuese.

Trajnimi dyditor, i implementuar nga organizata “Internews Kosova”, ishte i ndarë në katër sesione, që përfshinin informacione lidhur me bazat e gazetarisë, shkathtësitë e shkrimit gazetaresk, gazetarisë televizive, hulumtuese dhe etikën e gazetarisë.

Trajnimi dhe vizita studimore u bë në zyrat e KALLXO.com, ku nxënësit panë për së afërmi procesin e punës së një redaksie mediale.

Redaktori i KALLXO.com Visar Prebreza në ditën e parë të trajnimit u ligjëroi nxënësve lidhur me bazat e gazetarisë dhe teknikat që sjellin produktet e ndryshme mediale.

Ndërsa Valdet Salihu, producent në KALLXO.com, dhe në emisionin “Drejtësia në Kosovë”, u tregoi nxënësve më shumë lidhur me anën teknike të prodhimit medial.

Ai u dha mundësinë nxënësve të shohin mënyrën e funksionimit të mjeteve si kamera dhe foto aparati.

Në sesionin e ditës së dytë të trajnimit, Doruntina Baliu, redaktore në KALLXO.com realizoi ushtrime të shkrimit të lajmeve dhe intervistave me nxënësit.

Ajo me shembuj konkretë diskutoi me nxënësit temat që ata mund të trajtojnë dhe produktet mediale që mund t’i prodhojnë me interes të gjeneratës së tyre, në platformën KALLXO Rinia.

Në ditën e dytë të trajnimit, nxënësit po ashtu morën informacione lidhur me anën ligjore të funksionimit të mediave.

Labinot Leposhtica, koordinator i Zyrës Ligjore në KALLXO.com, njoftoi pjesëmarrësit në trajnim me institucionet dhe organet që rregullojnë funksionimin e mediave dhe për Ligjin e Shpifjes.

Ai shpjegoi kujdesin që gazetarët duhet ta kenë në respektimin e kodit të etikës në gazetari dhe profesionalizmin.

Pjesëmarrësit u certifikuan ndërsa disa prej tyre do të jenë të përzgjedhur për të vazhduar bashkëpunimin me KALLXO.com, përkatësisht platformën KALLXO Rinia.

Trajnime të tilla do të realizohen në pesë komuna të Kosovës: Prizren, Ferizaj, Mitrovicë, Gjilan dhe Prishtinë.

Ky projekt mbështetet nga  Ministria e Arsimit, Shkencës dhe Teknologjisë dhe implementohet nga Internews Kosova.